Rev 16 | MHL | STEP | Ne aria opor oko tempel koor kemena-pa imenaremi wi ensel ikur okaiwi-pa erup nain wia farek, “Mua Maneka bagiaw wiowa epira opap ikeman nain ikiwep miiwa-pa sawikeka!”

Revelation of John 16

Mua Maneka bagiaw wiar urufamik

1 Ne aria opor oko tempel koor kemena-pa imenaremi wi ensel ikur okaiwi-pa erup nain wia farek, “Mua Maneka bagiaw wiowa epira opap ikeman nain ikiwep miiwa-pa sawikeka!” 2 Ne ensel miimowa nain-ke ookikir ikiwep epira opap ikua nain miiwa-pa sawikak. Sawikeya wi mua eena maa eneka asia siisia onaiya ikemik nain ne wi maa eneka miira sirarep lotu onam-ikemik nain, ikemika samo-samora aawemik.

3 Aria ensel oko-ke epira opap ikua nain ifera-pa sawikak. Sawikeya ifer maneka faa, iiwawun aka kuisow arek, mua umowa aka saarik. Naapeya ifera maa unowa ikomakek nain iiwawun umomakek.

4 Ne aria kiiriw oko-ke ona epira opap ikua nain eka opora ne eka arona-pa sawikomakek. Naap oneya eka unowa faa, aka manekiw. 5 Ne eka urufiya ensel nain-ke naap maeya miimam, “Se-ek, oo Maneka, moresaren. Wi sira samo-samora onam-ikemik nain makena-pariw wia kiripoman. No iiriw ikon ne aakisa pun naap ikain! 6 Wis-ke nena teeria ne wi profet wia ifakimiwkin wi aka miiwa-pa wiar orok nain nos-ke nain kiripami eka aka imenarek nain wienaken!” 7 Naap ikok opor oko patirow esimsa-pa feenap maeya miimam, “Makena, yiena Maneka, Mua Maneka kekanowa akena, wi naap oniwkin nos-ke kakeniw nain kiripan!” Naap maek.

8 Nain weesereya ensel oko-ke epira opap ikua nain ama-pa sawikak. Ama-pa sawikeya yoowa manek akena-pa mua wia kuumeya samor akena awemik. 9 Samor akena awemi Mua Maneka amukaremi unuma samoramik, moram napum samora sira-sira nain Mua Maneka ona maeya imenarek. Yoowa aawemik, nain wi kema kirep o unuma me wiar fakeramik, weetak akena.

10 Ne aria ensel oko-ke epira opap ikua nain maa eneka asia pokiya esimsa-pa wiar sawikak. Sawikeya maa eneka asia maa muutitik urufomakiya nain kokoma-ke iiwawun wiar ifemakek. Naap areya wi mua mia tiitinowa ne ikemika manek akena nain aawemik, naeya wiena enek muuna geegenemi omaiwa wiam kuemik. 11 Ne Iinan Mua Maneka amukaremi unuma samoram-ikemik. Naap aremik, nain wi iiriw sira samora onam-ikemik nain kema me kiremik.

12 Nain weesereya ensel oko-ke epira opap ikua nain Yufretis eka opor maneka-pa sawikak. Nan sawikeya eka maneka nain iiwawun saanarek. Eka saanarep ikaeya wi ama urupow kame owow saria mane-maneka eliw ekapuk naep naap onak. 13 Aria naap ikok feenap urufam, ewar samora arow ikia saarik arep imenaremik. Oko ifa maneka nain opaimika-pa imenarek, oko maa eneka asia opaimika-pa imenarek ne oko wadol profet opaimika-pa imenarek. 14 Ewar samora arow nain wi sawur-ke, ne wi maa miililina unowa imenami miiw unowa ikiwep wi owow saria mane-maneka irakowa wia faremik. Wiena irakow teeria wia aawep Mua Maneka fofa maneka wuak neeke Mua Maneka teeria wiamiya irakiyen naep.

15 “Ni miimeka, yo ikum mua saarik ekapinen. Naapeya wi mua palanowiw ikok mia suuwowa wameiya-pa wuap-puimik nain wi eliw kemeluk. Oko yo ekapemkun mia saporma baurariwkin mua unowa urufiwkin emina ururikuan!”

16 Ne aria ewar samora arow nain-ke wi owow saria wia wiimep epa oko-pa wia fiirimemik, epa nain Iibru opora-pa Armagedon naimik.

17 Nain weesereya ensel murarow akena nain-ke epira opap ikua nain aapereka iinan-pa sawikak. Aapereka-pa sawikeya opor maneka tempel koor kemena-pa kerew akena feenap farek, “Aakisa weeserek!” 18 Ne aria aapereka wilinowa, paranowa ne maa ofofona onaiya wuak. Maa ofofona faa, manek akena, miiw mua iiriw maa ofofona maneka naap nain-ko me urufamik. 19 Iir nain owow maneka nain miiwa pukep kakawa arow imenarek. Ne miiw maneka owow unowa iiwawun samorarek. Mua Maneka-ke owow maneka Babilon kema suuwap ona wain eka urupa-pa sawikap wienakek. Wain eka nain Mua Maneka bagiaw-ke. 20 Mot unowa iiwawun mesenalek ne ema mane-maneka pun iiwawun mesenalemi epa uruma arek. 21 Ipia mokok mane-maneka nain-ke aapereka iinan-pa tenep ururemi mua wia ifakimomakek. Ipia mokok mane-maneka nain pina wenup, i mua pina saarik. Wi maa samor akena nain urufap Mua Maneka amukaremi unuma samoramik.